First Aid Sa Nerbiyos o Stress

First Aid Sa Nerbiyos o Stress
Ni Dr. Willie T. Ong

Dear Doc Willie, Bakit mabilis ang tibok ng puso ko kapag ako’y ninenerbiyos? Ano ang first aid sa ganitong kalagayan? Eloisa.

Sa oras ng maramdaming sitwasyon, ang katawan natin ay naglalabas ng isang kemikal na tinatawag na epinephrine. Ito’y ginagamit ng ating katawan kung may peligro.

Nakarinig ka na siguro ng taong binuhat ang muebles nila sa oras ng sunog. Iyan ang taglay ng epinephrine.

Sa pagkakataon na kayo ay nagalit, nagtatalumpati, o may matinding problema, ay naglalabas ng epinephrine ang katawan. Dahil dito, bumibilis ang tibok ng iyong puso.

Para sa mga may nerbiyos, nagbibigay ako ng isang pangpakalmang gamot tulad ng Bromazepam 1.5 mg na maihihingi ng reseta sa doktor. Mabisa ito.

Pero may natural ding paraan para labanan ang kaba.

Umupo sa isang tabi. Huminga ng malalim at mabagal ng walong beses.

Gamitin ang imahinasyon para makalikha ng isang matahimik na lugar sa iyong isipan.

Puwede din kumain ng saging at uminom ng isang basong tubig. May pampa-relaks na taglay ang saging.

Magpahinga din at magdasal sa Diyos. Ok lang iyan kaibigan, relax ka lang.